…………………………………………………………………………………………………………………………………….
ସାରାଂଶ – ଟ୍ରମ୍ପଙ୍କ ନିଷ୍ପତ୍ତି କ’ଣ ଭାରତକୁ ପ୍ରଯୁକ୍ତିବିଦ୍ୟା ଜଗତରେ ଆତ୍ମନିର୍ଭରଶୀଳ କରି ଅତି ଉଚ୍ଚକୁ ନେଇଯିବ ?
ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତୀୟଙ୍କୁ ଦୃଷ୍ଟିରେ ରଖି ଆମେରିକୀୟ କମ୍ପାନୀଗୁଡ଼ିକୁ ବିଦେଶୀ କର୍ମଚାରୀ ନିଯୁକ୍ତି ବନ୍ଦ କରିବାକୁ କହିଛନ୍ତି। ଏପରି ପରିସ୍ଥିତିରେ ଭାରତ ବିପଦ ଆପଦକୁ ସୈାଭାଗ୍ୟରେ ପରିଣତ କରିପାରିବ ? କାରଣ ପ୍ରତିବର୍ଷ ଭାରତରେ ୧୫ ଲକ୍ଷ ଯୁବକ ଇଞ୍ଜିନିୟର ବନନ୍ତି। ଯଦି ଟ୍ରମ୍ପଙ୍କ ନିର୍ଦ୍ଦେଶ କାର୍ଯ୍ୟକାରୀ ହୁଏ, ତେବେ ଏମାନେ ବିଦେଶକୁ ଯିବା ପରିବର୍ତ୍ତେ ପ୍ରଯୁକ୍ତିବିଦ୍ୟା କ୍ଷେତ୍ରରେ ଭାରତକୁ ମଜବୁତ କରିପାରିବେ।
……………………………………………………………………………………………………………………………………
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଏକ ବୟାନ ଭାରତ ସମେତ ଅନେକ ଦେଶର ଟେକ୍ ଇଞ୍ଜିନିୟରମାନଙ୍କୁ ଚିନ୍ତାରେ ପକାଇଛି। ସମ୍ପ୍ରତି ଟ୍ରମ୍ପ ଆମେରିକୀୟ ଟେକ୍ କମ୍ପାନୀଗୁଡ଼ିକୁ ବିଦେଶୀ କର୍ମଚାରୀ ନିଯୁକ୍ତି ବନ୍ଦ କରିବାକୁ କହିଛନ୍ତି। ଟ୍ରମ୍ପଙ୍କ ଆମେରିକା ଫାଷ୍ଟ ନୀତି ଅନୁଯାୟୀ ଆମେରିକୀୟ କମ୍ପାନୀଗୁଡ଼ିକ ବାହାରର ଲୋକଙ୍କୁ ନିଯୁକ୍ତି ଦେବା ପରିବର୍ତ୍ତେ ନିଜ ଦେଶର କର୍ମଚାରୀଙ୍କୁ ପ୍ରାଥମିକତା ଦେବା ଉଚିତ। ଟ୍ରମ୍ପଙ୍କ ଏହି ବିବୃତି ଭାରତୀୟ ଇଞ୍ଜିନିୟରଙ୍କ ଆମେରିକୀୟ ସ୍ୱପ୍ନକୁ ଧୂଳିସାତ୍ କରିଛି। କିନ୍ତୁ ଭାରତ ଏପରି ଏକ ଦେଶ, ଯାହା ବିପର୍ଯ୍ୟୟ ସମୟରେ ମଧ୍ୟ ସୁଯୋଗ ଖୋଜି ବାହାର କରେ ତଥା ବିପଦ ଆପଦକୁ ସୈାଭାଗ୍ୟରେ ପରିଣତ କରିଥାଏ।
ଆଇ,ଏ,ଏନ୍,ଏସ୍, ରିପୋର୍ଟରୁ ଜଣାପଡିଛି ଯେ ଯଦି ଟ୍ରମ୍ପ ଭାରତୀୟ ଟେକ୍ ଇଞ୍ଜିନିୟରମାନଙ୍କ ପାଇଁ ଆମେରିକା ପ୍ରବେଶର ଦ୍ୱାର ବନ୍ଦ କରିଦିଅନ୍ତି, ତଥାପି ଭାରତ ଟେକ୍ ଜଗତରେ ଶୀଘ୍ର ନିଜକୁ ପ୍ରତିଷ୍ଠିତ କରିନେବ। କାରଣ ଭାରତ ପାଖରେ ତଥା ତାହାର ଏହି ଯୁବ ପ୍ରତିଭାଧରଙ୍କ ଠାରେ ସେହି ଦକ୍ଷତା ରହିଛି।
ପ୍ରତିବର୍ଷ ଭାରତରେ ୧୫ ଲକ୍ଷ ନୂଆ ଇଞ୍ଜିନିୟର ବାହାରନ୍ତି
ଗତ କିଛି ଦଶନ୍ଧି ଧରି ଭାରତୀୟ ଇଞ୍ଜିନିୟରମାନଙ୍କର ଆମେରିକାର ବଡ଼ ବଡ଼ କମ୍ପାନୀଗୁଡ଼ିକରେ ଖୁବ୍ ବୋଲବାଲା ରହିଛି ତଥା ଖୁବ୍ ପ୍ରାଧାନ୍ୟ ରହିଛି । ଏହା କହିବା ଭୁଲ ହେବ ନାହିଁ ଯେ ଆମେରିକୀୟ କମ୍ପାନୀଗୁଡ଼ିକ ଭାରତ ଉପରେ ନିର୍ଭରଶୀଳ ଅଛନ୍ତି। ଭାରତର ବଡ଼ ବଡ଼ ପ୍ରତିଷ୍ଠାନ (IIT)ରୁ ବାହାରୁଥିବା ସ୍ନାତକମାନେ ଆମେରିକୀୟ କମ୍ପାନୀଗୁଡ଼ିକ ଠାରୁ ଭଲ ପ୍ୟାକେଜ୍ ପାଆନ୍ତି ଏବଂ ସେଠାରେ ପ୍ରତିଷ୍ଠିତ ହୋଇଯାଆନ୍ତି। କିନ୍ତୁ ଏବେ ଟ୍ରମ୍ପଙ୍କ ନୂତନ ନୀତି ସେମାନଙ୍କ ପାଇଁ ସମସ୍ୟା ସୃଷ୍ଟି କରିଛି। ପ୍ରତିବର୍ଷ ୧୫ ଲକ୍ଷ ଇଞ୍ଜିନିୟର ଭାରତରେ ସ୍ନାତକ ହୁଅନ୍ତି। ଏବେ ଏହି ଇଞ୍ଜିନିୟରମାନଙ୍କ ପାଇଁ ଭାରତ ପାଇଁ କାମ କରିବାର ସମୟ ଆସିଛି। ଭାରତ ପାଖରେ ପ୍ରଯୁକ୍ତି ବିଦ୍ୟାରେ ଆତ୍ମନିର୍ଭରଶୀଳ ହେବାର ସୁଯୋଗ ଅଛି।
ଭାରତର ଇଣ୍ଡିଆ ଏ,ଆଇ, ମିଶନରେ ଯୋଗଦାନ ଦେଇପାରିବେ - ଭାରତ ସରକାର ଗତ ବର୍ଷ ଇଣ୍ଡିଆ ଏ, ଆଇ,ମିଶନ ଆରମ୍ଭ କରିଥିଲେ, ଯାହାର ଲକ୍ଷ୍ୟ ହେଉଛି ସ୍ଥାନୀୟ ସ୍ତରର ପ୍ରଯୁକ୍ତିବିଦ୍ୟା ଦ୍ଵାରା ଭାରତରେ ଘଟୁଥିବା ପ୍ରଯୁକ୍ତିବିଦ୍ୟା ସମସ୍ୟାର ସମାଧାନ କରିବା। ଏହି ମିଶନର ଲକ୍ଷ୍ୟ ହେଉଛି କୃଷି, ସ୍ୱାସ୍ଥ୍ୟ ଏବଂ ଭାରତୀୟ ଭାଷା ପାଇଁ AI ମଡେଲ ବିକଶିତ କରିବା। ସମ୍ପ୍ରତି ଭାରତ ସରବମ୍ - ୧ ଏ, ଆଇ,ମଡେଲ ସୃଷ୍ଟି କରିଛି, ଯାହା ଭାରତୀୟ ଭାଷା ପାଇଁ ତିଆରି କରାଯାଇଛି। ଭାରତ ସରକାର କମ୍ପ୍ୟୁଟିଂ ଭିତ୍ତିଭୂମିକୁ ସୁଦୃଢ଼ କରିବା, ଗବେଷଣାରେ ନିବେଶ କରିବା ଏବଂ ଷ୍ଟାର୍ଟଅପ୍ଗୁଡ଼ିକୁ ପ୍ରୋତ୍ସାହିତ କରିବା ପାଇଁ କାମ କରୁଛନ୍ତି। ଏହି ସବୁ ସମ୍ମିଳିତ ଭାବେ ଭାରତକୁ ପ୍ରଯୁକ୍ତିବିଦ୍ୟା କ୍ଷେତ୍ରରେ ଏକ ବଡ଼ ପରିବର୍ତ୍ତନ ଆଣିବା ଆଡ଼କୁ ନେଇଯାଉଛି।
ଟେକ୍ନୋଲୋଜି କ୍ଷେତ୍ରରେ ଭାରତର ଦୃଢ଼ ଭିତ୍ତିଭୂମି - ଟେକ୍ନୋଲୋଜି କ୍ଷେତ୍ରରେ ଭାରତର ପୂର୍ବରୁ ଏକ ଦୃଢ଼ ଭିତ୍ତିଭୂମି ରହିଛି। ଦେଶରେ ୯ ଶହ ନିୟୁତରୁ ଅଧିକ ଇଣ୍ଟରନେଟ୍ ସଂଯୋଗ ଅଛି, ଯାହା ଏହାକୁ ବିଶ୍ୱର ସବୁଠାରୁ ବଡ଼ ଡିଜିଟାଲ୍ ବଜାର ମଧ୍ୟରୁ ଗୋଟିଏ କରିଥାଏ। UPI, ଆଧାର ଏବଂ ONDC ଭଳି ସିଷ୍ଟମଗୁଡ଼ିକୁ କେବଳ ଭାରତରେ ନୁହେଁ, ବରଂ ସାରା ବିଶ୍ୱରେ ଗ୍ରହଣ କରାଯାଉଛି। ଭାରତୀୟ ସଫ୍ଟୱେର୍ ଏବଂ ଫିନଟେକ୍ କମ୍ପାନୀଗୁଡ଼ିକ ଯେପରିକି ଷ୍ଟାର୍ଟଅପ୍ ଏବଂ ୟୁନିକର୍ନ, ବିଶ୍ୱବ୍ୟାପୀ ନିଜର ଛାପ ସୃଷ୍ଟି କରୁଛନ୍ତି। ରିପୋର୍ଟ ଅନୁଯାୟୀ ପ୍ରତିବର୍ଷ ସେମାନଙ୍କର ରପ୍ତାନି ୨ ଶହ ବିଲିୟନ ଡଲାରରୁ ଅଧିକ। ଏହା ସ୍ପଷ୍ଟ ଭାବରେ ଦର୍ଶାଉଛି ଯେ ଭାରତ ଟେକ୍ନୋଲୋଜି କ୍ଷେତ୍ରରେ ନିଜ ପାଇଁ ଏକ ନାମ ଉଚ୍ଚା କରିବାର ସାମର୍ଥ୍ୟ ରଖିଛି।
