ଏଥର ବିଜେପି ଉଭୟ ରାଜ୍ୟ ଓ କେନ୍ଦ୍ର ଶାସନରେ ରହିଛି। ଫଳରେ ଏଥର ଯିଏ ରାଜ୍ୟ ବିଜେପିର ସଭାପତି ହେବେ, ତାଙ୍କର ନିଶ୍ଚିତ ଦବଦବା ରହିବ। ମୁଖ୍ୟତଃ ରାଜ୍ୟ ସରକାରରେ ତାଙ୍କର ବଡ ଦଖଲ ରହିବ। ସେଥିପାଇଁ ଏବେ ଠାରୁ ରାଜ୍ୟ ବିଜେପିର ସଭାପତି ନିର୍ବାଚନକୁ ନେଇ ବେଶ୍ ଉତ୍ସୁକତା ପ୍ରକାଶ ପାଇଛି। ଏହି ପରିପ୍ରେକ୍ଷୀରେ କିଏ ହେବେ ସଭାପତି, ତାକୁ ନେଇ ଆରମ୍ଭ ହୋଇଯାଇଛି କଳ୍ପନାଜଳ୍ପନା। ଏ ସବୁ ଭିତରେ ରାଜ୍ୟ ବିଜେପିରେ ଅଙ୍କକଷା ମଧ୍ୟ ଆରମ୍ଭ ହୋଇଯାଇଛି।
ଦଳୀୟ ନିର୍ବାଚନ କରିବା ପାଇଁ କେନ୍ଦ୍ର ଜଣଙ୍କୁ ନିର୍ବାଚନ ଅଧିକାରୀ ଭାବେ ନିଯୁକ୍ତି ମଧ୍ୟ ଦେଇସାରିଛନ୍ତି। ସେ ଖୁବ ଶୀଘ୍ର ଆସି ଏ ନେଇ ପ୍ରସ୍ତୁତି ଆରମ୍ଭ କରିବେ। ବର୍ତ୍ତମାନ ରାଜ୍ୟ ବିଜେପିର ବିଭିନ୍ନ ମଣ୍ଡଳୀ ସ୍ତରୀୟ ସଭାପତି ନିର୍ବାଚନ ଚାଲିଛି। ଏହା ସରିବା ପରେ ଜିଲ୍ଲା ସଭାପତିଙ୍କ ନିର୍ବାଚନ ଅନୁଷ୍ଠିତ ହେବ। ଏହାପରେ ରାଜ୍ୟ ସଭାପତିଙ୍କ ନିର୍ବାଚନ।
ବର୍ତ୍ତମାନ ରାଜ୍ୟ ବିଜେପିର ସଭାପତି ହେବା ପାଇଁ ଦୁଇଜଣଙ୍କର ନାମ ବେଶ ଚର୍ଚ୍ଚାରେ ରହିଛି। ଜଣେ ହେଉଛନ୍ତି ବର୍ତ୍ତମାନର ସଭାପତି ମନମୋହନ ସାମଲ। ତାଙ୍କୁ ପୁଣି ଥରେ ସଭାପତି କରାଯାଇପାରେ ବୋଲି କୁହାଯାଉଛି। କାରଣ ସେ ଚଳିତ ଲୋକସଭା ଓ ବିଧାନସଭା ନିର୍ବାଚନକୁ ବେଶ ଭଲ ଭାବେ ପରିଚାଳନା କରିଛନ୍ତି। ତାଙ୍କ ସଭାପତିତ୍ବ ବଳରେ ରାଜ୍ୟରେ ବିଜେପି ଏକକ ସଂଖ୍ୟା ଗରିଷ୍ଠତା ହାସଲ କରିପାରିିଛି। ତେଣୁ କେନ୍ଦ୍ର ପୁଣି ଥରେ ତାଙ୍କୁ ଦାୟିତ୍ବ ଦେଇପାରେ। ତେବେ ଆଉ ଯେଉଁ ଜଣଙ୍କର ନାମ ଚର୍ଚ୍ଚା ହେଉଛି, ସେ ହେଉଛନ୍ତି ରାଜ୍ୟ ଉପସଭାପତି ଗୋଲକ ମହାପାତ୍ର। ସେ ରାଜ୍ୟ ବିଜେପିର ଜଣେ ମଙ୍ଗୁଆଳ ନେତା। ଦୀର୍ଘ ବର୍ଷ ଧରି ଦଳ ଭିତରେ ଶୃଙ୍ଖଳିତ ଢଙ୍ଗରେ କାର୍ଯ୍ୟ କରିଆସୁଛନ୍ତି। ସମସ୍ତ ସହିତ ଖାପ ଖୁଆଇ ସେ ଦଳକୁ ଆଗକୁ ନେବାର ଦକ୍ଷତା ରହିଛି। ଅନ୍ୟପକ୍ଷରେ ସେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଅତି ପ୍ରିୟ ବ୍ୟକ୍ତି। ତେଣୁ ସେ ସଭାପତି ହୋଇପାରନ୍ତି ବୋଲି ବେଶ ଚର୍ଚ୍ଚା ଚାଲିଛି।
ହେଲେ ଅନ୍ୟ ଏକ ଗୋଷ୍ଠୀର କହିବା ଅନୁସାରେ କେନ୍ଦ୍ର ବିଜେପି କେତେବେଳେ କଣ ନିଷ୍ପତ୍ତି ନେବ, ତାହା କହି ହେବନାହିଁ। ମୋହନ ମାଝୀ ମୁଖ୍ୟମନ୍ତ୍ରୀ ହେବେ ବୋଲି କେହି କେବେ ଭାବି ନ ଥିଲେ। ହେଲେ କେନ୍ଦ୍ର ତାଙ୍କୁ ମୁଖ୍ୟମନ୍ତ୍ରୀ ଆସନରେ ବସେଇ୍ଦେଲେ। ସେହିପରି ରାଜ୍ୟ ସଭାପତି ପାଇଁ କେନ୍ଦ୍ର ହୁଏତ ଶେଷ ମୁହୁର୍ତ୍ତରେ କିଛି "ବିସ୍ମୟ" ଦେଇପାରେ ବୋଲି କୁହାଯାଉଛି।
