ଆଲେଖ୍ୟ – ଜବାହର ମିଶ୍ର
………………………………………………………………
ମଙ୍ଗଳବାର ଦିନ ଦିଲ୍ଲୀର ଉଷ୍ମ ପରିବେଶରେ ସଂସଦ ଭବନ ଭିତରେ ଯେତେବେଳେ ଏନ୍,ଡି,ଏ,ର ସାଂସଦମାନଙ୍କ ବୈଠକ ଆରମ୍ଭ ହେଲା, ସେତେବେଳେ ହୁଏତ କେହି କଳ୍ପନା ସୁଦ୍ଧା କରିନଥିଲେ ଯେ ଏହି ବୈଠକରେ ଏପରି ଏକ ବିବୃତି ଉଷ୍ଣ ତରଙ୍ଗ ପ୍ରବାହିତ ହେବ, ଯାହା ରାଜନୀତିର କରିଡରରେ ଆଲୋଚନାର ଝଡ଼ ସୃଷ୍ଟି କରିବ। ଯେତେବେଳେ ବୈଠକରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗୃହମନ୍ତ୍ରୀ ଅମିତ ଶାହଙ୍କ ସଫଳତାର ଚିଠା ବିଷୟ ଉଲ୍ଲେଖ କରି କହିଲେ ଯେ “ଏବେ ତ ବାସ୍ ଆରମ୍ଭ ମାତ୍ର”, ସେତେବେଳେ ପରିବେଶରେ ଅଳ୍ପ କିଛି ସମୟ ଲାଗି ନୀରବତା ରାଜତ୍ଵ କରିବା ପରେ ଗୃହର କାନ୍ଥ ବାଡ ସର୍ବତ୍ର ଘନଘନ କରତାଳି ପ୍ରତିଧ୍ଵନିତ ହୋଇଥିଲା।
ଶବ୍ଦରେ ଲୁଚି ରହିଥିବା ସଂକେତ
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଏହି ବିବୃତି କେବଳ ଶାହାଙ୍କ ପ୍ରଶଂସା ନୁହେଁ , ବରଂ ଭବିଷ୍ୟତରେ ରାଜନୈତିକ ନେତୃତ୍ୱର ଦିଗ ଏବଂ ଏନଡିଏ ର ରଣନୀତିର ଏକ ସୂଚନା ଥିଲା। ଯେତେବେଳେ ମୋଦି କହିଲେ ଯେ ଅମିତ ଶାହ ଏପର୍ଯ୍ୟନ୍ତ ଦେଶର ସବୁଠାରୁ ଅଧିକ ସମୟ ଧରି କେନ୍ଦ୍ର ଗୃହମନ୍ତ୍ରୀ ଭାବରେ କାର୍ଯ୍ୟ କରିସାରିଛନ୍ତି ଏବଂ ଏହା "କେବଳ ଆରମ୍ଭ ମାତ୍ର", ସେତେବେଳେ ଅନେକ ସାଂସଦଙ୍କ ମୁହଁରେ ଆଶ୍ଚର୍ଯ୍ୟ ଏବଂ କୌତୁହଳର ରେଖା ଦେଖାଗଲା। ଆଲୋଚନା ତୀବ୍ର ହୋଇଥିଲା, ଏହି ବିବୃତି କ'ଣ ଅମିତ ଶାହଙ୍କ ପାଇଁ ଭବିଷ୍ୟତରେ ଆଉ କିଛି ବଡ଼ ଦାୟୀତ୍ୱର ସୂଚନା ଦେଉଛି? ଏହା କ'ଣ ବିଜେପି ଭିତରେ ଏକ ଦୃଢ଼ ଉତ୍ତରାଧିକାରୀଙ୍କ ନିର୍ମାଣର ପ୍ରସ୍ତୁତି ?
ଧାରା ୩୭୦ ଠାରୁ ଅପରେସନ ମହାଦେବ ପର୍ଯ୍ୟନ୍ତ ଗୃହମନ୍ତ୍ରୀ ଅମିତ ଶାହାଙ୍କ ନାମରେ ଅନେକ ବଡ଼ ନିଷ୍ପତ୍ତିର କାର୍ଯ୍ୟକାରୀତା ଅଛି। ତାଙ୍କ ନେତୃତ୍ୱରେ ୨୦୧୯ ମସିହାରେ ଜମ୍ମୁ ଏବଂ କାଶ୍ମୀରରୁ ଧାରା ୩୭୦ ହଟାଇ ଦିଆଯାଇଥିଲା, ଯାହା ଦଶନ୍ଧି ଦଶନ୍ଧି ଧରି ଭାରତୀୟ ରାଜନୀତିର କେନ୍ଦ୍ରରେ ବିବାଦର ବିଷୟ ଥିଲା। ଏହା ବ୍ୟତୀତ ସେ ଦେଶବ୍ୟାପୀ ନକ୍ସଲ ବିରୋଧୀ ଅଭିଯାନକୁ ଏକ ନୂତନ ଦିଗଦର୍ଶନ ମଧ୍ୟ ଦେଇଥିଲେ। ସେ ଅନେକ ଥର ଦୋହରାଇଥିଲେ ଯେ ଭାରତ ମାର୍ଚ୍ଚ ୩୧, ୨୦୨୬ ସୁଦ୍ଧା ନକ୍ସଲବାଦ ମୁକ୍ତ ହେବ ଏବଂ ଏଥିପାଇଁ ଭୂମି ସ୍ତରରେ ଜବରଦସ୍ତ ଅଭିଯାନ ଚାଲିଛି। ସଦ୍ୟ ସମାପ୍ତ ହୋଇଥିବା ଅପରେସନ ସିନ୍ଦୂର ଏବଂ ଅପରେସନ ମହାଦେବ ମଧ୍ୟ ଶାହଙ୍କ ରଣନୈତିକ ଚିନ୍ତାଧାରାର ଏକ ଅଂଶ, ଯାହାକୁ ଏନଡିଏ ବୈଠକରେ ବିଶେଷ ଭାବରେ ପ୍ରଶଂସା କରାଯାଇଥିଲା। ପ୍ରଧାନମନ୍ତ୍ରୀ ମୋଦି ନିଜେ ଏହି ଅଭିଯାନଗୁଡ଼ିକର ସଫଳତା ଉଲ୍ଲେଖ କରି ବିରୋଧୀଙ୍କୁ ଟାର୍ଗେଟ କରି କହିଥିଲେ ଯେ, "ଏଗୁଡ଼ିକ ଉପରେ ବିତର୍କ କରିବା ବିରୋଧୀଙ୍କ ଭୁଲ ଥିଲା" ।
ରାଜନୈତିକ ସଙ୍କେତଗୁଡିକର ଏକ ଖେଚେଡି
ମୋଦିଙ୍କ ଏହି ଗୋଟିଏ ବାକ୍ୟ "ଏବେ ତ ବାସ୍ ଆରମ୍ଭ ମାତ୍ର" ଉପରେ ଅନେକ କଳ୍ପନାଜଳ୍ପନା ଢେଉ ଉଠିଛି। କିଛି ନେତା ବିଶ୍ୱାସ କରନ୍ତି ଯେ ଏହି ମନ୍ତବ୍ୟ ଏନଡିଏ ର ପରବର୍ତ୍ତୀ ଇନିଂସ ପ୍ରତି ଏକ ସଙ୍କେତ। କେତେକ ବିଶ୍ୱାସ କରନ୍ତି ଯେ ମୋଦି ଏବଂ ଶାହଙ୍କ ଯୋଡ଼ି ଆଗାମୀ ବର୍ଷଗୁଡ଼ିକରେ ଆହୁରି ସକ୍ରିୟ ହେବେ, ହୁଏତ ୨୦୨୯ ଲାଗି ରଣନୀତି ଏବେ ପ୍ରସ୍ତୁତ ହେଉଛି। ଯଦିଓ କେନ୍ଦ୍ରମନ୍ତ୍ରୀ କିରେନ ରିଜିଜୁ ସ୍ପଷ୍ଟ କରିଛନ୍ତି ଯେ ପ୍ରଧାନମନ୍ତ୍ରୀ ମେଣ୍ଟ ବିଷୟରେ ଏହା କହିଥିଲେ, କିନ୍ତୁ ଯେଉଁମାନେ ରାଜନୀତି ଜାଣନ୍ତି ସେମାନେ ଜାଣନ୍ତି ଯେ ମୋଦିଙ୍କ ପ୍ରତ୍ୟେକ ଶବ୍ଦର ଗୋଟିଏ ନୁହେଁ, ବରଂ ଅନେକ ଅର୍ଥ ରହିଥାଏ ଏବଂ ସେଗୁଡ଼ିକ ପବନରେ ଉଡ଼ିଯାଏ ନାହିଁ।
ନୂତନ ପିଢ଼ିକୁ ସୁଯୋଗ ଦେବା ପାଇଁ ସଂଘର ପରାମର୍ଶ
ନିକଟରେ ଆର୍,ଏସ୍,ଏସ୍,ର ମୁଖ୍ୟ ମୋହନ ଭାଗବତ କହିଥିଲେ ଯେ ଏକ ନିର୍ଦ୍ଦିଷ୍ଟ ବୟସ ପରେ ନେତାମାନେ ନୂତନ ପିଢ଼ି ପାଇଁ ରାସ୍ତା ଛାଡ଼ିବା ଉଚିତ। ସେ ବିଜେପିର ସେହି ଅଲିଖିତ ନୀତି ଉପରେ ମଧ୍ୟ ଗୁରୁତ୍ୱାରୋପ କରିଥିଲେ, ଯେଉଁଥିରେ ନେତାମାନଙ୍କୁ ୭୫ ବର୍ଷ ବୟସ ପରେ ଅବସର ନେବାକୁ ପଡ଼ିଥାଏ। ଏହି ନୀତି ଦଳର ଅନେକ ପ୍ରବୀଣଙ୍କ ଉପରେ ମୋଦି ଏବଂ ଶାହା ଲାଗୁ କରିଥିଲେ । ଏପରି ସମୟରେ ଯେତେବେଳେ ଆର୍,ଏସ୍, ଏସ୍ ,ଦଳ ଉପରେ ମୋଦି-ଶାହଙ୍କ ଦୃଢ଼ ପକଡକୁ ଢିଲା କରିବାକୁ ଚେଷ୍ଟା କରୁଛି, ସେତେବେଳେ ମୋଦିଙ୍କ ଏହି ବକ୍ତବ୍ୟ ଆହୁରି ଗୁରୁତ୍ୱପୂର୍ଣ୍ଣ ହୋଇଯାଏ।
ବିଜେପି ସାଂସଦମାନେ କ’ଣ କୁହନ୍ତି?
ବିଜେପିର ଜଣେ ସାଂସଦ ଗଣମାଧ୍ୟମକୁ କହିଛନ୍ତି ଯେ, "ମୋଦିଜୀ ସ୍ପଷ୍ଟ ଭାବରେ ସୂଚାଇ ଦେଇଛନ୍ତି ଯେ ଅମିତ ଭାଇଙ୍କୁ ଏବେ ବି ବହୁତ ଦୂର ଯିବାକୁ ଅଛି। ତାଙ୍କର ବୟସ ଏବେ ମାତ୍ର ୬୦ ବର୍ଷ ଏବଂ ସେ ଉତ୍ତରାଧିକାରୀ ହେବା ପାଇଁ ସମ୍ପୂର୍ଣ୍ଣ ପ୍ରସ୍ତୁତ।" ସେହି ସମୟରେ ଅନ୍ୟ ଜଣେ ଦଳୀୟ ସାଂସଦ କହିଛନ୍ତି ଯେ ମୋଦିଙ୍କ ବକ୍ତବ୍ୟ କୌଣସି ଜଣେ ନେତାଙ୍କ ପାଇଁ ନୁହେଁ, ବରଂ ସମଗ୍ର ଦଳ ପାଇଁ ଏକ ସାମୂହିକ ବାର୍ତ୍ତା। ଜଣେ ବରିଷ୍ଠ ବିଜେପି ନେତା ନାମ ଗୋପନ ରଖିବା ସର୍ତ୍ତରେ ଗଣମାଧ୍ୟମକୁ କହିଛନ୍ତି ଯେ, "ପ୍ରଧାନମନ୍ତ୍ରୀଙ୍କ ବକ୍ତବ୍ୟ ସ୍ପଷ୍ଟ କରୁଛି ଯେ ଦଳର ଶୀର୍ଷ ନେତୃତ୍ୱ ସଂରଚନାରେ କୌଣସି ଦ୍ୱନ୍ଦ୍ୱ ନାହିଁ ଏବଂ ମୋଦି-ଶାହ ଯୋଡ଼ି ପୂର୍ବ ପରି ଦୃଢ଼ ରହିଛି।" ଉଲ୍ଲେଖନୀୟ ଯେ ୨୦୧୪ ଲୋକସଭା ନିର୍ବାଚନରେ ଉତ୍ତର ପ୍ରଦେଶର ୮୦ ଆସନରୁ ୭୧ ଆସନ ଜିତିବାରେ ଅମିତ ଶାହଙ୍କ ଭୂମିକା ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଏ।
ରାଜ୍ୟସଭାରେ ଶାହଙ୍କୁ ଦାୟିତ୍ୱ, ଯୋଗୀଙ୍କୁ ଝଟକା ?
ସଂସଦର ମୌସୁମୀ ଅଧିବେଶନରେ ଅପରେସନ ସିନ୍ଦୂର ଉପରେ ବିତର୍କ ସମୟରେ ମୋଦି ଲୋକସଭାରେ ବିରୋଧୀଙ୍କ ପ୍ରଶ୍ନର ଉତ୍ତର ଦେଇଥିଲେ, କିନ୍ତୁ ରାଜ୍ୟସଭାରେ ଏହି ଦାୟିତ୍ୱ ଅମିତ ଶାହଙ୍କୁ ଦିଆଯାଇଥିଲା। ଜଣେ ବରିଷ୍ଠ ବିଜେପି ନେତା ଏହାକୁ ଏକ ଗୁରୁତ୍ୱପୂର୍ଣ୍ଣ ଘଟଣା ବୋଲି କହି କହିଛନ୍ତି ଯେ, "ମୋଦିଙ୍କ ବଦଳରେ ଶାହା ରାଜ୍ୟସଭାରେ ଉତ୍ତର ଦେବା ଏହାର ଏକ ସୂଚନା ଯେ ସେ କାହାକୁ ତାଙ୍କର ଉତ୍ତରାଧିକାରୀ ଭାବରେ ଦେଖନ୍ତି।"
ଯୋଗୀ ଆଦିତ୍ୟନାଥ ଦୌଡ଼ରୁ ବାହାର ?
ଏସବୁ ଆଲୋଚନା ମଧ୍ୟରେ ଏହା ସ୍ପଷ୍ଟ ହେବାରେ ଲାଗିଛି ଯେ ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏବଂ ଅନ୍ୟ ଦାବିଦାରମାନେ ଏବେ ପ୍ରଧାନମନ୍ତ୍ରୀ ପଦ ଦୌଡ଼ରୁ ସମ୍ଭବତଃ ବାହାର। ଝାଡ଼ଖଣ୍ଡର ଗୋଡ୍ଡାର ବିଜେପି ସାଂସଦ ନିଶିକାନ୍ତ ଦୁବେଙ୍କ ବୟାନ ମଧ୍ୟ ଏହି କଥାକୁ ଆହୁରି ମଜବୁତ କରିଛି। ଏହା ବ୍ୟତୀତ ୟୁପି ମୁଖ୍ୟ ଶାସନ ସଚିବ ମନୋଜ ସିଂହଙ୍କ କାର୍ଯ୍ୟକାଳ ବୃଦ୍ଧି ନ ହେବା ମଧ୍ୟ ଏହି ଦିଗରେ ଏକ ସଙ୍କେତ ବୋଲି ବିବେଚନା କରାଯାଉଛି।
ରାଜନୈତିକ କରିଡରରେ କ’ଣ ଚର୍ଚ୍ଚା ହେଉଛି?
ମୋଦି ଏବଂ ଶାହଙ୍କ ବର୍ଦ୍ଧିତ ଦାୟିତ୍ୱର ଏହି ବୟାନ ରାଜନୈତିକ ମହଲରେ ହଇଚଇ ସୃଷ୍ଟି କରିଛି। କ’ଣ ଅମିତ ଶାହଙ୍କୁ ପ୍ରକୃତରେ ପ୍ରଧାନମନ୍ତ୍ରୀ ପଦ ପାଇଁ ପରବର୍ତ୍ତୀ ଦାବିଦାର ଭାବରେ ବିବେଚନା କରାଯାଉଛି? ନା ଏହା ବିଜେପିର ବଡ଼ ରଣନୀତିର ଏକ ଅଂଶ ବିଶେଷ ? ଆଗାମୀ ଦିନ ନିଶ୍ଚିତ ଭାବରେ ଏହି ପ୍ରଶ୍ନର ଉତ୍ତର ଦେବ।
ସଂଘ ଆଉ କିଛି ଭାବୁଥିବ
ମୋଦି ନିଜ ଉତ୍ତରାଧିକାରୀ ମନୋନୀତ କରିବା ତାଙ୍କର ବ୍ୟକ୍ତିଗତ ବ୍ୟାପାର। କିନ୍ତୁ ସେ କାହାକୁ ମନୋନୀତ କରିଦେଲେ ଯେ ଦଳ ବିଶେଷ କରି ସଂଘ ନେତୃତ୍ବ ତାଙ୍କୁ ଭାବୀ ପ୍ରଧାନମନ୍ତ୍ରୀ ରୂପେ ଗ୍ରହଣ କରିବ, ତାର କିଛି ନିୟମ ନାହିଁ। ସଂଘ ହେଉଛି ବିଜେପିର ମାତୃ ସଂଗଠନ। ଏହାର ନିଷ୍ପତ୍ତି ସର୍ବୋପରି। ନରେନ୍ଦ୍ର ମୋଦିଙ୍କୁ ୨୦୧୪ ରେ ବିଜେପିର ପ୍ରଧାନମନ୍ତ୍ରୀ ପ୍ରାର୍ଥୀ ମନୋନୟନ ଏହି ସଂଘ ନେତୃତ୍ବ କରିଥିଲା। ସଂଘ ମୁଖ୍ୟ ମୋହନ ଭାଗବତ ଏଥିଲାଗି ସବୁଜ ସଙ୍କେତ ଦେଲାପରେ ଯାଇ ମୋଦି ଗୁଜରାଟରୁ ଦିଲ୍ଲୀ ଆସିଥିଲେ ନିର୍ବାଚନ ଲଢ଼ିବାକୁ । ଏହାର ଅର୍ଥ ଏହା ନୁହେଁ ଯେ ଶାହା ପ୍ରଧାନମନ୍ତ୍ରୀ ହେବାକୁ ଯୋଗ୍ୟ ନୁହନ୍ତି। ତାଙ୍କ ଠାରେ ପ୍ରଧାନମନ୍ତ୍ରୀ ବନିବାର ସମସ୍ତ ଯୋଗ୍ୟତା ରହିଛି। କିନ୍ତୁ ଯୋଗ୍ୟତା ଯେତେ ବିଶାଳ ହେଲେ ବି ତାହା ସଂଘର ମନ ମସ୍ତିଷ୍କକୁ ପ୍ରଭାବିତ କରିପାରିବନାହିଁ। ସଂଘ ଯାହାକୁ ଚାହିଁବ, ସେ ହିଁ ମୋଦିଙ୍କ ଉତ୍ତରାଧିକାରୀ ହେବେ। ସଂଘ ଏଥିଲାଗି ଶାହାଙ୍କ ନାମ ନିଜର ଗୁଡ୍ ବୁକ୍ ତଥା ପସନ୍ଦ ଖାତାରେ ରଖିଛି କି ଯୋଗୀ ଆଦିତ୍ୟନାଥ କି ନୀତିନ ଗଡକରୀ କି ଆଉ କାହା ନାମ ରଖିଛି, ତାହା ଜଣାନାହିଁ। ତେବେ ସେ ଯାହା ହେଉ ଉତ୍ତରାଧିକାରୀ ମନୋନୟନରେ ମୋଦିଙ୍କ ପସନ୍ଦର ଓଜନ ଯେତେ ଭାରି ରହିଲେ ବି ସଂଘର ଓଜନ ଏହା ତୁଳନାରେ ଅଧିକ ଭାରି ରହିବ
