……………………………………………………………………..
ଚାରି ଚାରି ଥର କଲ୍… କୌଣସି ଉତ୍ତର ନାହିଁ ! ମୋଦିଙ୍କ କଠୋର ମନୋଭାବରେ ଟ୍ରମ୍ପ୍ ହେଲେ କ୍ଷୁବ୍ଧ, ସେ ଏବେ ୫୦ ପ୍ରତିଶତ ଶୁଳ୍କ ଲଗାଇ ଭାରତକୁ ଚକିତ କରିବେ ?
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଫୋନ୍ କଲ୍ କୁ କୁଆଡେ଼ ଅଣଶୁଣା କରିଛନ୍ତି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଚାପ ସତ୍ତ୍ୱେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରୁଷରୁ ତେଲ କିଣିବା ମନସ୍କତାରେ ଅଟଳ ଅଛନ୍ତି। ଜର୍ମାନ ରିପୋର୍ଟରେ ଦାବି କରାଯାଇଛି ଯେ ମୋଦି ଟ୍ରମ୍ପଙ୍କ ଚାରୋଟି ଫୋନ୍ କଲ୍ ର ଉତ୍ତର ଦେଇ ନାହାଁନ୍ତି। ଏହି ବିବାଦ ଯୋଗୁ ଭାରତକୁ ୫୦ ପ୍ରତିଶତ ଆମେରିକା ଶୁଳ୍କର ଝଟକା ଭୋଗିବାକୁ ପଡିବ କି ? ଏପରି ଆଶଙ୍କା ବିଭିନ୍ନ ଗଣମାଧ୍ୟମରେ ପ୍ରକାଶ ପାଇଛି।
ଆମେରିକା ଏବଂ ଭାରତ ମଧ୍ୟରେ ବାଣିଜ୍ୟ ଉତ୍ତେଜନା ନିରନ୍ତର ବୃଦ୍ଧି ପାଉଛି। ଜର୍ମାନ ଖବରକାଗଜ ଫ୍ରାଙ୍କଫର୍ଟର ଅଲଗେମେଇନ୍ ଜେଟଙ୍ଗ (F.A.Z.) ଦାବି କରିଛି ଯେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଫୋନ୍ ମାଧ୍ୟମରେ ଚାରିଥର ଯୋଗାଯୋଗ କରିବାକୁ ଚେଷ୍ଟା କରିଥିଲେ, କିନ୍ତୁ ମୋଦିଙ୍କ ଠାରୁ କୌଣସି ଉତ୍ତର ପାଇ ନଥିଲେ। ରିପୋର୍ଟ ଅନୁଯାୟୀ ଟ୍ରମ୍ପଙ୍କ ଅଭିଯୋଗ, ଧମକ ଏବଂ ଚାପର ପାରମ୍ପରିକ ରଣନୀତି ଭାରତ ଉପରେ କୌଣସି ପ୍ରଭାବ ପକାଉନାହିଁ। ଭାରତୀୟ ଅଧିକାରୀମାନେ ଏପର୍ଯ୍ୟନ୍ତ ଏହି ଦାବିଗୁଡ଼ିକର କୌଣସି ସରକାରୀ ଉତ୍ତର ଦେଇନାହାଁନ୍ତି।
ରିପୋର୍ଟରେ କୁହାଯାଇଛି ଯେ ମୋଦି ସରକାର ଆମେରିକାର ଚାପରେ ଆମେରିକୀୟ କୃଷି କମ୍ପାନୀଗୁଡ଼ିକ ପାଇଁ ଭାରତର ବଜାର ଖୋଲୁନାହାଁନ୍ତି। ଏହା ସହିତ ରୁଷରୁ ଭାରତର ତୈଳ ଆମଦାନି ମଧ୍ୟ ଜାରି ରହିଛି। ଟ୍ରମ୍ପ ଅଭିଯୋଗ କରିଛନ୍ତି ଯେ ଏହି କ୍ରୟ “ପୁଟିନଙ୍କ ଯୁଦ୍ଧ ମେସିନ୍ ” ପାଇଁ ପାଣ୍ଠି ଯୋଗାଉଛି , କିନ୍ତୁ ଭାରତ ଏହାର ଉର୍ଜା ସୁରକ୍ଷା ସହିତ ସାଲିସ କରିବାକୁ ପ୍ରସ୍ତୁତ ନୁହେଁ।
ଆମେରିକାର ଶୁଳ୍କ ବଢାଇପାରେ
ଯଦି ପରିସ୍ଥିତିରେ ପରିବର୍ତ୍ତନ ନହୁଏ, ତେବେ ଆମେରିକା ଭାରତ ଉପରେ ୫୦ ପ୍ରତିଶତ ପର୍ଯ୍ୟନ୍ତ ଶୁଳ୍କ ବଢାଇପାରେ, ଆଉ ଆମେରିକା ଦୁଇ ଦିନ ତଳେ ଏପରି ଘୋଷଣା କରିସାରିଛି। ଏଥିରେ ବାଣିଜ୍ୟ ଅସନ୍ତୁଳନ ପାଇଁ ୨୫ ପ୍ରତିଶତ ଶୁଳ୍କ ଏବଂ ରୁଷ ସହିତ ତୈଳ ଚୁକ୍ତି ପାଇଁ ଆଉ ୨୫ ପ୍ରତିଶତ ଶୁଳ୍କ ଲାଗୁ ହେବ। ଟ୍ରମ୍ପଙ୍କ ପରାମର୍ଶଦାତା ପିଟର ନାଭାରୋ ସ୍ପଷ୍ଟ ଶବ୍ଦରେ କହିଛନ୍ତି ଯେ ଭାରତକୁ ଏବେ କୌଣସି ଅତିରିକ୍ତ ରିହାତି ମିଳିବାର ସମ୍ଭାବନା ନାହିଁ। ରିପୋର୍ଟରେ କୁହାଯାଇଛି ଯେ ମୋଦି ଆମେରିକା ରାଷ୍ଟ୍ରପତିଙ୍କ ମିଡିଆ ଷ୍ଟଣ୍ଟର ଅଂଶ ହେବାକୁ ଏଡ଼ାଇ ଯାଉଛନ୍ତି। ସମ୍ପ୍ରତି ଟ୍ରମ୍ପ କୌଣସି ପ୍ରକୃତ ଚୁକ୍ତି ବିନା ସୋସିଆଲ ମିଡିଆରେ ଭିଏତନାମ ସହିତ ଏକ ଚୁକ୍ତି ଘୋଷଣା କରିଛନ୍ତି।
ମୋଦି ଏପରି ପରିସ୍ଥିତିକୁ ଏଡାଇ ଯାଉଛନ୍ତି। WION ର ଏକ ରିପୋର୍ଟରେ ସମ୍ବାଦପତ୍ର ବିଶ୍ଳେଷକ ମାର୍କ ଫ୍ରାଜିୟରଙ୍କୁ ଉଦ୍ଧୃତ କରି କହିଛି ଯେ ଆମେରିକାର ଭାରତ-ପ୍ରଶାନ୍ତ ମହାସାଗର ରଣନୀତି, ଯେଉଁଥିରେ ଭାରତକୁ ଚୀନ୍ ବିରୁଦ୍ଧରେ ଏକ ଗୁରୁତ୍ୱପୂର୍ଣ୍ଣ ଅଂଶୀଦାର ଭାବରେ ବିବେଚନା କରାଯାଏ, ଏବେ ଦୁର୍ବଳ ହେଉଛି।
ଭାରତର ମୋଟ ରପ୍ତାନୀର ଏକ ପଞ୍ଚମାଂଶ ଆମେରିକାକୁ ଯାଏ। ଏପରି ପରିସ୍ଥିତିରେ ଯଦି ନୂତନ ଶୁଳ୍କ ଲାଗୁ କରାଯାଏ, ତେବେ ଭାରତର ଆର୍ଥିକ ଅଭିବୃଦ୍ଧି ୬.୫ ରୁ ୫.୫ ପ୍ରତିଶତକୁ ହ୍ରାସ ପାଇପାରେ।
ଭାରତରେ ଟ୍ରମ୍ପଙ୍କ ଲୋକପ୍ରିୟତା ହ୍ରାସ ପାଇଛି
ରିପୋର୍ଟରେ କୁହାଯାଇଛି ଯେ ପୂର୍ବରୁ ପ୍ୟୁ ରିସର୍ଚ୍ଚ ସର୍ଭେରେ ପ୍ରତ୍ୟେକ ଦ୍ୱିତୀୟ ଭାରତୀୟ ଟ୍ରମ୍ପଙ୍କୁ ବିଶ୍ୱାସ କରୁଥିଲେ। କିନ୍ତୁ ବର୍ତ୍ତମାନ ଟ୍ରମ୍ପଙ୍କର ପାକିସ୍ତାନ ପ୍ରତି ମଧୁର ଭାବକୁ ନେଇ ଭାରତର ସୋସିଆଲ ମିଡିଆରେ କ୍ରୋଧ ପ୍ରକାଶ ପାଉଛି। ଟ୍ରମ୍ପ ପାକିସ୍ତାନର ସେନା ମୁଖ୍ୟ ଅସୀମ ମୁନିରଙ୍କ ସହିତ ହ୍ୱାଇଟ୍ ହାଉସ୍ ରେ ମଧ୍ୟାହ୍ନ ଭୋଜନ କରିବା ଏବଂ “ଭାରତ ଦିନେ ପାକିସ୍ତାନରୁ ତେଲ କିଣିବ” ବୋଲି ତାଙ୍କ ବକ୍ତବ୍ୟକୁ ଭାରତୀୟମାନେ ଭଲ ଭାବରେ ଗ୍ରହଣ କରିନାହାଁନ୍ତି।
ଏକ ନୂତନ ରଣନୀତି ଆଡକୁ ଭାରତ
ଏହି ପରିସ୍ଥିତିରେ ପ୍ରଧାନମନ୍ତ୍ରୀ ମୋଦି ନୂତନ ଅଂଶୀଦାରଙ୍କ ଆଡକୁ ମୁହାଁଇଛନ୍ତି। ରିପୋର୍ଟରେ କୁହାଯାଇଛି ଯେ ମୋଦି ଏହି ସପ୍ତାହରେ ତିଆନଜିନରେ ଅନୁଷ୍ଠିତ ହେବାକୁ ଥିବା ସାଂଘାଇ ସହଯୋଗ ସଂଗଠନ (SCO) ସମ୍ମିଳନୀରେ ଯୋଗଦେବେ। ବିଶେଷଜ୍ଞମାନେ ବିଶ୍ୱାସ କରନ୍ତି ଯେ ଭାରତ ଏବଂ ଚୀନ୍ ବୈଶ୍ଵିକ ସଂସ୍ଥାଗୁଡିକରେ ଅଧିକ ପ୍ରଭାବ ପକାଇବାରେ ସମାନ ସ୍ୱାର୍ଥ ରଖନ୍ତି। ଏହା ସହିତ ଚୀନର ନିବେଶ ଏବଂ ପ୍ରଯୁକ୍ତିବିଦ୍ୟା ଭାରତୀୟ ଶିଳ୍ପକୁ ଏକ ନୂତନ ଦିଗ ଦେଇପାରିବ।
