ଦିଲ୍ଲୀରେ ବିଜେପି ଭବ୍ୟ ବିଜୟ ହାସଲ କରିଛି। ୨୭ ବର୍ଷ ପରେ ଦିଲ୍ଲୀ ଦଖଲ କଲା ଭାରତୀୟ ଜନତା ପାର୍ଟି । ତୃତୀୟ ଥର କ୍ଷମତାକୁ ଆସିବାର ଆପ୍ ଯେଉଁ ସ୍ବପ୍ନ ଦେଖୁଥିଲା ତାହାୂ କେବଳ ସ୍ବପ୍ନରେ ହିଁ ରହିଗଲା । ୭୦ଟି ବିଧାନସଭା ଆସନରେ ଭୋଟ୍ ହେବା ପରେ ସାମ୍ନାକୁ ଆସିଥିଲା ଏକଜିଟ୍ ପୋଲ । ଏକଜିଟ୍ ପୋଲରେ ଚିତ୍ର ସ୍ପଷ୍ଟ ଦିଶୁଥିଲା କି, ଏଥର ବିଜେପି ହିଁ ବାଜି ମାରିବ ।
ପ୍ରାରମ୍ଭିକ ଟ୍ରେଣ୍ଡରେ ବି ବିଜେପି ବାଜି ମାରୁଥିବା ଚିତ୍ର ସ୍ପଷ୍ଟ ହୋଇଥିଲା । ସେପଟେ ପରାଜୟକୁ ସ୍ବୀକାର କରି କେଜ୍ରିୱାଲ କହିଛନ୍ତି ଦିଲ୍ଲୀବାସୀଙ୍କ ନିଷ୍ପତ୍ତିକୁ ଆମେ ଗ୍ରହଣ କରିଛୁ, ବିରୋଧୀ ଦଳରେ ରହି ଲୋକଙ୍କ ଲାଗି କାମ କରିବୁ । ତେବେ ବିଜେପିର ବିଜୟ ପରେ ମୋଦୀ ଟ୍ବିଟ କରି କହିଛନ୍ତି, ଦିଲ୍ଲୀବାସୀ ଆମକୁ ବିଶ୍ବାସ କରିଛନ୍ତି । ଆଗାମୀ ଦିନରେ ବିକାଶ ଆହୁରି ଅଧିକ ହେବ । ଏଥର କହି କହି ବିଜେପି ଜିତିଲା ଦିଲ୍ଲୀ । କାମ କଲା ମୋଦିଙ୍କ ମ୍ୟାଜିକ, ଆସ୍ଥା ହରାଇଲେ କେଜ୍ରିୱାଲ ।
ରାଜଧାନୀ ଦିଲ୍ଲୀରେ ପ୍ରାୟ ୨୭ ବର୍ଷ ପରେ କ୍ଷମତାକୁ ଆସିଛି ବିଜେପି । ଅବଶ୍ୟ ୨୦୧୪ରୁ ମୋଦୀଙ୍କ ଲୋକପ୍ରିୟତା ବଢିବାରେ ଲାଗିଥିଲା । ହେଲେ ଦିଲ୍ଲୀରେ କିନ୍ତୁ ବିଜେପିର ଜଲୱା ଦେଖିବାକୁ ମିଳିନଥିଲା । ୨୦୨୦ ବିଧାନସଭା ନିର୍ବାଚନରେ ବି ବିଜେପି ହାରିଥିଲା । ହେଲେ ଏଥର ଖେଳ ପୁରା ଓଲଟି ଯାଇଥିଲା। ଅର୍ଥାତ୍ ବିଜେପି ସପକ୍ଷରେ ଭୋଟ୍ ଦେଇଛନ୍ତି ଦିଲ୍ଲୀ ଜନତା । ସବୁଠୁ ବିଷମ ସ୍ଥିତି ଉପୁଜିଥିଲା ୨୦୧୫ରେ । କାରଣ ୭୦ ବିଧାନସଭା ଆସନରୁ ଆପ୍ ୬୭ ଆସନରେ ବିଜୟ ହୋଇଥିଲା । ମୋଦିଙ୍କ ଲୋକପ୍ରିୟତା ଥିବା ପରେ ବି ଦିଲ୍ଲୀ ଲୋକ ଆପ୍ ଉପରେ ବିଶ୍ବାସ ଜମାଇଥିଲେ । ପରେ ପରେ ରାଜ୍ୟସ୍ତରରୁ ଜାତୀୟ ସ୍ତରକୁ ନିଜ ଦଳକୁ ନେଇଥିଲେ କେଜ୍ରିୱାଲ । ୨୦୧୪ ପରେ ୨୦୧୯ରେ ବିଜେପି ଦେଶର ଅଧିକାଂଶ ଲୋକସଭା ଆସନରେ ବିଜୟ ହୋଇଥିଲା । ଏମିତିକି ଦିଲ୍ଲୀର ୭ଟି ଯାକ ଲୋକସଭା ଆସନରେ ପଦ୍ମ ଫୁଟିଥିଲା । କିନ୍ତୁ ବିଧାନସଭାରେ କରିସ୍ମା ଦେଖିବାକୁ ମିଳିନଥିଲା ବିଜେପିର । ୨୦୧୪ ପରଠାରୁ କ୍ରମାଗତ ଭାବରେ ବିଜେପି ଖାତାରେ ଅଧିକରୁ ଅଧିକ ଆସନ ଯୋଡ଼ି ହେଉଥିଲା । ଗୋଟିଏ ପରେ ଗୋଟିଏ ରାଜ୍ୟରେ ସେ ବାଜି ବି ମାରୁଥିଲେ । କିନ୍ତୁ ଦିଲ୍ଲୀରେ ସେମିତି କିଛି ହେଉନଥିଲା ।
କୁହାଯାଇଥିଲା କି ବିଜେପି ଦିଲ୍ଲୀରେ ମୁଖ୍ୟମନ୍ତ୍ରୀ ପ୍ରାର୍ଥୀ କିଏ ସ୍ଥିର କରିନପାରିବାରୁ ଏମିତି ସ୍ଥିତି ହେଲା। କିନ୍ତୁ ଏମିତି ବି ଅନେକ ରାଜ୍ୟ ଅଛି ଯେଉଁ ରାଜ୍ୟରେ ବିଜେପି ମୁଖ୍ୟମନ୍ତ୍ରୀ ଚେହେରା ସାମ୍ନାକୁ ନଆଣି ବି ନିର୍ବାଚନ ଜିତିଛି । ହେଲେ ଦିଲ୍ଲୀରେ ସତ ଚେଷ୍ଟା ପରେ ବି ବିଜେପି ଜିତିପାରିନଥିଲା । ଯେଉଁଥି ଲାଗି ଟେନସନରେ ଥିଲେ ବିଜେପି ନେତୃତ୍ବ । ହେଲେ ଏଥର ମୋଦି ଓହ୍ଲାଇଥିଲେ ପ୍ରଚାର ମୈଦାନକୁ । ପ୍ରଚାର ଆରମ୍ଭରୁ ହିଁ ସିଧାସିଧା ଆକ୍ରମଣ କରିବା ସହିତ କେଜ୍ରିୱାଲଙ୍କ ଗୋଟିଏ ପରେ ଗୋଟିଏ ଦୁର୍ନୀତିର ପର୍ଦ୍ଦାଫାଶ କରିଥିଲେ । ଖାଲି ଦିଲ୍ଲୀ ନୁହେଁ ବରଂ ଓଡ଼ିଶାରେ ବି ୨୪ ବର୍ଷର ସରକାରକୁ ହରାଇ ବାଜି ମାରିଥିଲା ବିଜେପି । ଅବଶ୍ୟ ପଶ୍ଚିମବଙ୍ଗଠୁ ଆରମ୍ଭ କରି ଦକ୍ଷିଣ ଭାରତରେ ବିଜେପିର ଏତେ ଦବଦବା ନାହିଁ। କିନ୍ତୁ ଯେଉଁପରି ଭାବରେ ବିଜେପି ସଶକ୍ତ ହେଉଛି, ସେଥିରୁ ଗୋଟିଏ କଥା ସ୍ପଷ୍ଟ ଯେ ପୁରା ଭାରତରେ ବିଜେପି ଲୋକପ୍ରିୟତା ବଢିବାରେ ଲାଗିଛି । ଏବେ ଚର୍ଚ୍ଚା, ଦିଲ୍ଲୀରେ ଜିତିବା ପରେ ମୋଦିଙ୍କର ଆଉ କେଉଁ ରାଜ୍ୟ ଜିତିବାକୁ ଇଚ୍ଛା । ଅବଶ୍ୟ ଏନେଇ ବିଜେପି ନେତା କୌଣସି ପ୍ରତିକ୍ରିୟା ରଖିନାହାନ୍ତି କିନ୍ତୁ ଆଲୋଚନା ଥମୁନି । ଆଗାମୀ ଦିନରେ ବିହାର ନିର୍ବାଚନ ହେଉଛି । ତେଣୁ ଏବେ ବିହାର ଉପରେ ପୂରା ଦେଶର ନଜର । ସେଠି ଗେରୁଆ ହୋଇପାରେ ଗଡ । ଏହା ପରେ ପଶ୍ଚିମବଙ୍ଗରେ ନିର୍ବାଚନ ହେବ। ସେଠାରେ ବିଜେପିର ଲୋକପ୍ରିୟତା ବଢୁଛି ଆଉ ତୃଣମୂଳ କଂଗ୍ରେସର ଲୋକପ୍ରିୟତା କମୁଛି । ଯଦି ସେଠାରେ ବିଜେପି ନେତୃତ୍ଵ ଉପଯୁକ୍ତ ରଣନୀତିର ସହିତ ଓହ୍ଲାଇ, ତେବେ ପଶ୍ଚିମବଙ୍ଗ ଦଖଲ କରିପାରେ।
ଦିଲ୍ଲୀରେ ବିଜୟ ପରେ, ଦେଶର ରାଜନୈତିକ ମାନଚିତ୍ର ସମ୍ପୂର୍ଣ୍ଣ ବଦଳି ଯାଇଛି। ଏବେ ଦେଶର ୧୯ଟି ରାଜ୍ୟ ଏବଂ ୨ଟି କେନ୍ଦ୍ରଶାସିତ ଅଞ୍ଚଳରେ ବିଜେପି ନେତୃତ୍ଵାଧୀନ ଏନ୍,ଡି,ଏ,ସରକାର ଅଛି। ୨୧ଟି ରାଜ୍ୟ ମଧ୍ୟରୁ ୬ଟିରେ ଏନ୍,ଡି,ଏ, ସହଯୋଗୀ ଦଳ ମୁଖ୍ୟ ଭୂମିକାରେ ଅଛନ୍ତି। ସେହିଭଳି ୧୫ଟି ରାଜ୍ୟରେ ଭାଜପା ନିଜେ ଶାସକ କ୍ଷମତାରେ ଅଛି। କେବଳ ଏତିକି ନୁହେଁ, ଜାତୀୟ ରାଜଧାନୀ ଦିଲ୍ଲୀରେ ବିପୁଳ ବିଜୟ ପରେ, ଏନ୍,ଡି,ଏ,ଏବେ ଉଭୟ କେନ୍ଦ୍ରଶାସିତ ଅଞ୍ଚଳରେ ମଧ୍ୟ କ୍ଷମତା ହାସଲ କରିଛି। ଦେଶର ୫ଟି ପ୍ରମୁଖ ରାଜ୍ୟ ମଧ୍ୟରୁ ୩ଟିରେ (ଉତ୍ତରପ୍ରଦେଶ, ମହାରାଷ୍ଟ୍ର, ଆନ୍ଧ୍ର, ବିହାର ଏବଂ ଗୁଜରାଟ) ଏନ୍ ଡି ଏ ମେଣ୍ଟର ସରକାର ଅଛି। ୟୁପି ଏବଂ ମହାରାଷ୍ଟ୍ରରେ ଯେଉଁଠାରେ ଭାଜପାର ନିଜସ୍ବ ମୁଖ୍ୟମନ୍ତ୍ରୀ ଅଛନ୍ତି। ସେହିଭଳି ବିହାରରେ ଜେଡିୟୁର ନୀତିଶ କୁମାର କ୍ଷମତାରେ ଅଛନ୍ତି। ଉତ୍ତର-ପୂର୍ବର ୭ଟି ରାଜ୍ୟ ମଧ୍ୟରୁ ୬ଟିରେ ଏନ୍ ଡି ଏ ଦବ୍ଦବା ରହିଛି। ଉତ୍ତର-ପୂର୍ବରେ, କେବଳ ମିଜୋରାମରେ କୌଣସି ଏନ୍ ଡି ଏ ସରକାର ନାହିଁ। ସେହିପରି, ତିନୋଟି ପାହାଡ଼ି ରାଜ୍ୟ (ଜମ୍ମୁ-କଶ୍ମୀର, ଉତ୍ତରାଖଣ୍ଡ ଏବଂ ହିମାଚଳ) ମଧ୍ୟରୁ ଉତ୍ତରାଖଣ୍ଡକୁ ଭାଜପା ଜିତିଛି।ଜମ୍ମୁ କଶ୍ମୀରରେ ଓମର ଅବଦୁଲ୍ଲା ମୁଖ୍ୟମନ୍ତ୍ରୀ ଥିବା ବେଳେ ହିମାଚଳରେ କଂଗ୍ରେସର ସୁଖବିନ୍ଦର ସିଂହ ସୁଖୁ ମୁଖ୍ୟମନ୍ତ୍ରୀ ଅଛନ୍ତି। ମଧ୍ୟପ୍ରଦେଶ, ଛତିଶଗଡ଼ ଏବଂ ରାଜସ୍ଥାନ ସହିତ, ମହାରାଷ୍ଟ୍ର ଏବଂ ଗୁଜରାଟରେ ମଧ୍ୟ ଭାଜପା କ୍ଷମତାରେ ଅଛି। ଭାଜପା ୨୦୨୨ରେ ଗୁଜରାଟ ଏବଂ ୨୦୨୩ରେ ମଧ୍ୟପ୍ରଦେଶ, ଛତିଶଗଡ଼ ଏବଂ ରାଜସ୍ଥାନରେ ବିଜୟୀ ହୋଇଥିଲା। ବିଜେପି ନେତୃତ୍ୱାଧୀନ ଏନ୍,ଡି,ଏ, ନଭେମ୍ବର ୨୦୨୪ରେ ମହାରାଷ୍ଟ୍ରରେ ଜିତିଥିଲା।
ସେହିପରି, ଉତ୍ତର ଭାରତରେ ବିହାର ଏବଂ ଉତ୍ତର ପ୍ରଦେଶରେ ଏନ୍,ଡି,ଏ, କ୍ଷମତାରେ ଅଛି। ଝାଡ଼ଖଣ୍ଡ ଏବଂ ପଶ୍ଚିମବଙ୍ଗରେ ଇଣ୍ଡିଆ ମେଣ୍ଟର ସରକାର ଅଛି। ଦକ୍ଷିଣ ଭାରତର ୫ଟି ରାଜ୍ୟରୁ ୪ଟିରେ ‘ଇଣ୍ଡିଆ’ ସରକାର କ୍ଷମତାରେ ଅଛି। କେରଳ, ତେଲେଙ୍ଗାନା, କର୍ନାଟକ ଏବଂ ତାମିଲନାଡୁରେ ଭାରତ ସରକାର ଥିବା ବେଳେ ଆନ୍ଧ୍ରରେ ଏନ୍ଡିଏ ସରକାର ଅଛି। ଦେଶର ଜନସଂଖ୍ୟା ବର୍ତ୍ତମାନ ପ୍ରାୟ ୧୪୦ କୋଟି। ଦିଲ୍ଲୀରେ ବିଜୟ ପରେ ଏନ୍ଡିଏ ୯୨ କୋଟି ଲୋକଙ୍କ ଉପରେ ଶାସନ କରୁଛି। ୧୦ କୋଟିରୁ ଅଧିକ ଜନସଂଖ୍ୟା ବିଶିଷ୍ଟ ଉତ୍ତର ପ୍ରଦେଶ (୨୪ କୋଟି), ମହାରାଷ୍ଟ୍ର (୧୨ କୋଟି) ଏବଂ ବିହାର (୧୨ କୋଟି)ରେ ଏନ୍,ଡି,ଏ, ଶାସନ କରୁଛି। ୧୦ କୋଟି କିମ୍ବା ତା'ଠାରୁ ଅଧିକ ଜନସଂଖ୍ୟା ଥିବା କୌଣସି ରାଜ୍ୟରେ 'ଇଣ୍ଡିଆ ମେଣ୍ଟ' ସରକାର ନାହିଁ। ୫ କୋଟିରୁ ଅଧିକ ଜନସଂଖ୍ୟା ବିଶିଷ୍ଟ ୭ଟି ରାଜ୍ୟ ମଧ୍ୟରୁ ୪ଟିରେ ଏନ୍ଡିଏ କ୍ଷମତାରେ ଅଛି। ତିନୋଟି ରାଜ୍ୟରେ ଭାରତ ସରକାର ଅଛି। ୫ କୋଟିରୁ ଅଧିକ ଜନସଂଖ୍ୟା ବିଶିଷ୍ଟ ପଶ୍ଚିମବଙ୍ଗ (୯ କୋଟି), ତାମିଲନାଡୁ (୭ କୋଟି) ଏବଂ କର୍ନାଟକ (୬ କୋଟି)ରେ ଅଖିଳ ଭାରତୀୟ ମେଣ୍ଟ ସରକାର ଅଛି। ସେହିପରି ଆନ୍ଧ୍ର ପ୍ରଦେଶ (୫ କୋଟି), ଗୁଜରାଟ (୬ କୋଟି), ମଧ୍ୟପ୍ରଦେଶ (୮ କୋଟି) ଏବଂ ରାଜସ୍ଥାନ (୮ କୋଟି)ରେ ଏନଡିଏ ସରକାର ଅଛି। ଯଦି ଆମେ ୧-୫ କୋଟି ଜନସଂଖ୍ୟା ବିଶିଷ୍ଟ ରାଜ୍ୟ ବିଷୟରେ କଥା ହେବା, ତେବେ ୧୦ ଟି ରାଜ୍ୟ ମଧ୍ୟରୁ ୬ ଟିରେ ଏନ୍,ଡି,ଏ କ୍ଷମତାରେ ଅଛି ଏବଂ ୪ ଟିରେ 'ଇଣ୍ଡିଆ'ସରକାର କ୍ଷମତାରେ ଅଛି।
ଆସାମ (୩.୫ କୋଟି), ଛତିଶଗଡ଼ (୩ କୋଟି), ଦିଲ୍ଲୀ (୧.୮୭ କୋଟି), ହରିୟାଣା (୨.୮ କୋଟି) ଭଳି ରାଜ୍ୟରେ ଏନଡିଏ କ୍ଷମତାରେ ଅଛି। ମେଘାଳୟର ଜନସଂଖ୍ୟା ପ୍ରାୟ ୩୩ ଲକ୍ଷ। ଏଠାରେ କୌଣସି ମେଣ୍ଟ ସରକାର ନାହିଁ।
୨୦୧୮ ମଧ୍ୟଭାଗରେ ଭାଜପାକ୍ଷମତାର ଶୀର୍ଷରେ ଥିଲା। ସେତେବେଳେ ଦଳର ୨୦ଟି ରାଜ୍ୟରେ ସରକାର ଥିଲା। ଏଥିରେ ସମସ୍ତ ୭ଟି ଉତ୍ତର-ପୂର୍ବ ରାଜ୍ୟ ସହିତ ଉତ୍ତର ପ୍ରଦେଶ, ଉତ୍ତରାଖଣ୍ଡ, ହିମାଚଳ, ଗୁଜରାଟ, ରାଜସ୍ଥାନ, ମଧ୍ୟ ପ୍ରଦେଶ, ଛତିଶଗଡ଼, ହରିୟାଣା ଏବଂ ମହାରାଷ୍ଟ୍ରର ସରକାର ଅନ୍ତର୍ଭୁକ୍ତ ଥିଲେ। ଏହା ପରେ ଭାଜପାର ପ୍ରଦର୍ଶନ ହ୍ରାସ ପାଇବାରେ ଲାଗିଲା। ୭ ବର୍ଷ ପରେ, ଏବେ ଭାଜପା ୨୦ଟି ରାଜ୍ୟର ରେକର୍ଡ ଭାଙ୍ଗିଛି।
