ଆମେରିକାର ଦାଦାଗିରି – ଭାରତ ଆଖିରେ ଆଖି ମିଶେଇ କଥା ହେବା ଟ୍ରମ୍ପ ପ୍ରଶାସନ ଚାହୁଁନାହିଁ – ଭାରତ ନଇଁ କରି ରହିବା ଚାହେଁ
……………………………………………………………………..
ଦୁଇଟି କଥା ସ୍ପଷ୍ଟ। ଟ୍ରମ୍ପ ପ୍ରଶାସନ ‘ଆଖିରେ ଆଖି ମିଶେଇ କଥା ହେବା ଏବଂ ସାର୍ବଭୌମତ୍ୱ ବିଷୟ ଉଲ୍ଲେଖ କରିବା ଅସହନୀୟ ହୋଇଛି। ତାଙ୍କ ପ୍ରଶାସନ କୌଣସି ଦେଶ ଆଲୋଚନା ସମୟରେ ତାହାର ଆର୍ଥିକ ସ୍ୱାର୍ଥ ବିଷୟରେ କଥା ହେବା ପାଇଁ ଅନୁମତି ଦିଏ ନାହିଁ।
ଡୋନାଲ୍ଡ ଟ୍ରମ୍ପ ପ୍ରଶାସନ ଭାରତ ଉପରେ କାହିଁକି ବିରକ୍ତ ତାହାର ରହସ୍ୟ ତାହାର ନିଜ ଅଧିକାରୀମାନେ ପ୍ରକାଶ କରୁଛନ୍ତି। ବାଣିଜ୍ୟ ମନ୍ତ୍ରୀ ସ୍କଟ୍ ବେସାଣ୍ଟ କହିଛନ୍ତି ଯେ ଏହାର କାରଣ କେବଳ ରୁଷରୁ ଅଶୋଧିତ ତେଲ କିଣିବା ନୁହେଁ, ବରଂ ଭାରତ ବାଣିଜ୍ୟ ଆଲୋଚନାରେ ‘ଜିଦି’ ମନୋଭାବ ମଧ୍ୟ ଗ୍ରହଣ କରୁଥିଲା। ଏବେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ମୁଖ୍ୟ ବାଣିଜ୍ୟ ପରାମର୍ଶଦାତା ପିଟର ନୋଭେରୋ କହିଛନ୍ତି ଯେ ‘ସେମାନେ (ଭାରତୀୟମାନେ) ଏତେ ଅହଂକାରୀ ଯେ ସେମାନେ ଆମ ଆଖିରେ ଆଖିଏ ମିଶେଇ ଦେଖନ୍ତି କହୁଛନ୍ତି ଯେ ସେମାନଙ୍କ ଦେଶରେ ଆମଦାନୀ ଶୁଳ୍କ ଅଧିକ ନୁହେଁ। ରୁଷ ତେଲ ସମ୍ପର୍କରେ, ସେମାନେ କୁହନ୍ତି ଯେ ଏହା ଆମର ସାର୍ବଭୌମତ୍ୱ ଅଟେ, ଆମେ ଯେଉଠାରୁ ଚାହିଁବୁ ସେଠାରୁ ତେଲ କିଣିପାରିବା।’
ତେଣୁ ଦୁଇଟିଯାକ କଥା ସ୍ପଷ୍ଟ। ‘ଆଖିରେ ଆଖି ମିଶେଇ କଥା ହେବା ଏବଂ ସାର୍ବଭୌମତ୍ୱ ଉଲ୍ଲେଖ କରିବା ଟ୍ରମ୍ପ୍ ପ୍ରଶାସନ ଲାଗି ଅସହନୀୟ ହୋଇଛି। ଯେତେବେଳେ ଟ୍ରମ୍ପ ଶୁଳ୍କ ଏବଂ ଅନ୍ୟାନ୍ୟ ଉପାୟରେ ଆମେରିକୀୟ ‘ମହାନତା’ ଫେରାଇ ଆଣିବାର ଭ୍ରମ ପୋଷଣ କରୁଛନ୍ତି, ସେତେବେଳେ ଏକଦା ଆମେରିକାର ଗୋଡାଣିଆ ହୋଇଥିବା ଏକ ଦେଶ ନିଜର ହିତକୁ ପ୍ରାଥମିକତା ଦେବା ବିଷୟକୁ ଟ୍ରମ୍ପ ପ୍ରଶାସନ ଗ୍ରହଣ କରିପାରୁନାହିଁ। ଏପରି ପରିସ୍ଥିତିରେ ଏହା ସ୍ପଷ୍ଟ ଯେ ଟ୍ରମ୍ପଙ୍କ ଶୁଳ୍କ ଛାଟର ମାଡରୁ ରକ୍ଷା ପାଇବାକୁ ହେଲେ ଭାରତ କେବଳ ଆମେରିକୀୟ କମ୍ପାନୀଗୁଡ଼ିକ ପାଇଁ ନିଜର ବଜାର ଏବଂ ସମ୍ବଳଗୁଡ଼ିକୁ ସମ୍ପୂର୍ଣ୍ଣ ଭାବରେ ଖୋଲିଦେଉ ଏବଂ ଏଥିନେଇ ଯେତେ କ୍ଷତି ହେଲେ ବି ଆମେରିକୀୟ ରଣନୈତିକ ଯୋଜନାର ଏକ ଅଂଶ ହୋଇରହୁ ।
ଏବେ ଏହା ବିଚାରଣୀୟ ଯେ ଭାରତ ଏତେ ଉଚ୍ଚ ମୂଲ୍ୟ ଚୁକେଇବା ଉଚିତ କି ? ଭାରତରେ ଆମେରିକୀୟ ସମର୍ଥକ ମତ ବହୁତ ଦୃଢ଼। ଭାରତୀୟ ଉଚ୍ଚବର୍ଗର ଆମେରିକା ଏବଂ ତାଙ୍କ ନେତୃତ୍ୱରେ ନବ-ଉଦାରବାଦୀ ଅର୍ଥନୈତିକ ମଡେଲ ପ୍ରତି ଗଭୀର ସ୍ୱାର୍ଥପୂରକ ସମ୍ଵନ୍ଧ ରହିଛି। ଏପରି ପରିସ୍ଥିତିରେ ଭାରତ ସରକାର ନିଜର ମତ ପରିବର୍ତ୍ତନ କରିବା ସହ ଆମେରିକା ସହିତ ସମ୍ପର୍କ ସୁଧାରିନେବା ନେଇ ଯୁକ୍ତି କରୁଥିବା ଲୋକଙ୍କର ଭାରତରେ ଅଭାବ ନାହିଁ। କିନ୍ତୁ ଏପରି ଗୋଷ୍ଠୀଗୁଡ଼ିକ ମନେ ରଖିବା ଉଚିତ ଯେ ବର୍ତ୍ତମାନର କେନ୍ଦ୍ର ସରକାରଙ୍କ ସ୍ୱାଭାବିକ ସମ୍ଵନ୍ଧ ରକ୍ଷା ଆଗ୍ରହ ମଧ୍ୟ ସେମାନଙ୍କ ପରି ଆମେରିକା ସପକ୍ଷରେ ରହିଛି। ଏହା ସତ୍ତ୍ୱେ, ଯଦି ଆମେରିକା ଭାରତର ଆଭିମୁଖ୍ୟକୁ ଭୁଲ୍ ବୁଝେ, ତେବେ ତାହାର ଅର୍ଥ ହେଉଛି ଯେ ନରେନ୍ଦ୍ର ମୋଦି ସରକାର ଏକ ସୀମା ପର୍ଯ୍ୟନ୍ତ ଯାଇ ଅଟକିଯାଇଛନ୍ତି । ମୋଦି ଏହାଠାରୁ ଅଧିକ ନଇଁବାକୁ ଦାବି କରିବା କେବଳ ଏକ ଅଜ୍ଞାନତା କିମ୍ବା ଅତ୍ୟନ୍ତ ସ୍ୱାର୍ଥପର ମନୋଭାବର ପରିଚାୟକ ବୋଲି କୁହାଯିବ।
